தமிழ் இலக்கணப் பேரகராதி

ஒருதலைக் காமத்தினை ஐந்து விருத்தத்தால் பாடுவது கைக்கிளைச்செய்யுளாம்.பிரபந்த மரபு, பன்னிரு பாட்டியல் இவை கைக்கிளைமாலை எனச்சுட்டுதலின் (பி.ம.30, பன்.பாட்.295), பாடல்கள் அந்தாதித் தொடையுறவருதல் வேண்டும்போலும்.ஒருதலைக் காமத்தினை முப்பத்திரண்டு வெண்பாவாற் பாடுதலும்கைக்கிளைப் பிரபந்தம் என்ப. (மு. வீ. யா. ஒ. 149; தொ. வி. 283உரை)

கைக்கிளையாகிய பொருள் பற்றி வரும் மருட்பா.எ-டு : ‘திருநுதல் வேர்அரும்பும்; தேங்கோதைவாடும்;இருநிலம் சேவடியும் தோயும்; – அரிபரந்தபோகிதழ் உண்கணும் இமைக்கும்ஆகும் மற்றிவன் அகவிடத்து அணங்கே’ (பு.வெ. 14:3) (யா.கா.செய்.15)

கைக்கிளை மருட்பா அல்லாத மருட்பாப் புறநிலைவாழ்த்து, வாயுறைவாழ்த்து, செவியறிவுறுத்தல் ஆகிய பொருண்மை பற்றி அடிவரையறை இன்றிவரும்; முதலில் வெண்பா இயலிலும் இறுதியில் ஆசிரிய இயலிலும் வரும். இவைபுறத்திணையிலேயே வரும். மருட்பாவில் உள்ள இரண்டு பாவும் இயற்சீரான்வருதல் சிறப்பு.இதன்கண் வரும் வெண்பாவின் குறைந்த அளவு ஏழுசீர்; வெண்பா நாலடிமுதல் பன்னீரடி முடிய உயர்ந்து வருதல் சிறப்பு. வெண்பா பன்னீரடியின்இகந்து வரினும், மருட்பா வில் வரும் ஆசிரியம் மூன்றடியின் இகவாது;ஈற்றயலடி முச்சீர்த்தாகவே வரும்.எ-டு : ‘தென்ற லிடைபோழ்ந்த ’ என்ற பாடல் புறநிலை.‘பலமுறையும் ஓம்பப்படுவன’ என்ற பாடல் வாயுறை.‘பல்யானை மன்னர் முருங்க’என்ற பாடல் செவியுறை.(தொ. செய். 161. நச்.)

ஒருபொருள் நுதலாது திரிந்து வரும் கலிவெண்பாட்டும்நெடுவெண்பாட்டோடு ஒருபுடை ஒப்புமையுடைமையின், அக்கலிவெண்பாட்டாகஇக்காலத்தோர் கூறும் உலாச் செய்யுளும் மடற்செய்யுளும்புறப்புறக்கைக்கிளையுள் அடங்கும். (தொ. செய். 118. நச்.)

கட்டைவிரலை நடுவிரலில் ஊன்றி இரண்டனையும் முறுக்கி
ஒலியெழுப்புதற்கண் நிகழும் கால இடைவெளியும், எழுத்தின் அளவாகிய
ஒருமாத்திரை கால இடைவெளியும் ஒன்றாகும். இவ்வாறு ஒலிஎழுப்புதற்கண்,
நினைத்தமாத்திரையானே கால்மாத்திரையும், கட்டைவிரலை நடுவிரலில்
ஊன்றியவழி அரை மாத்திரையும், முறுக்கியவழி முக்கால் மாத்திரையும், ஓசை
எழுப்பியவழி ஒரு மாத்திரையும் ஆகிய காலக்கழிவு நிகழும் என்ப.
நொடித்தல்தொழிலில் பிறந்த ஓசையது தோற்றக் கேட்டுக் காலக்கழிவும், அ
எனப் பிறந்த ஓசையது தோற்றக் கேட்டுக் காலக்கழிவும் ஒக்கும். (தொ. எ. 7
நச். உரை)

கையனார் என்பவர் இயற்றிய இந்நூற்கருத்துக்கள் யாப் பருங்கலவிருத்தியுள் மேற்கோளாக எடுத்தியம்பப் பெற்றுள. மெய்யின் மாத்திரை அரைஎன்பது, ஆய்தம் சொற்களில் அமையும் இடம், இயைபுத்தொடைக்குஎட்டுவிகற்பங்கள், நேரிசை ஆசிரியப் பாவிற்கு எடுத்துக்காட்டு,இடைப்புணர் முரணுக்கு எடுத்துக்காட்டு ஆகிய கையனார் யாப்புச்செய்திகள் அதன்கண் இடம் பெறுகின்றன.“நாற்சீரடிக்கண் முதல் அயற்சீர்க்கண் தொடை இல்லதனைக் கீழ்க்கதுவாய்எனவும், ஈற்றயற்சீர்க்கண் தொடையில்லதனை மேற்கதுவாய் எனவும் வேண்டினார்கையனார் முதலிய ஒரு சார் ஆசிரியர்” என யாப்பருங்கலக்காரிகையுரைகையனார் யாப்பு நூற் செய்தியைச் சுட்டுகிறது. (யா. வி. பக். 23, 27,138, 159; யா. கா. 19. உரை)