ஊர் பெயரகராதி

சங்க கால ஊர்கள்

பூஞ்சாற்றூர்‌ என்னும்‌ பெயருடைய இவ்வூர்‌ சோழநாட்டில்‌ முடி கொண்டான்‌ ஆற்றங்கரையில்‌ உளதென்பர்‌. சாறு என்றால்‌ விழா என்று பொருள்‌ உள்ளது. ஒருவேளை விழாக்கள்‌ நிறைந்த ஊர்‌ என்னும்‌ பொருளில்‌ விழாக்கள்‌ கொண்டாடப்‌ பெறும்‌ ஊர்‌ என்னும்‌ பொருளில்‌ சாற்றூர்‌ எனப்‌ பெயர்‌ பெற்று பூம்‌ என்ற முன்‌ ஒட்டுடன்‌ இணைந்து பூஞ்‌ சாற்றூர்‌ எனப்‌ பெயர்‌ பெற்றிருக்கலாம்‌. கெளணியன்‌ விண்ணந்தாயன்‌ என்னும்‌ அந்தணன்‌ பூஞ்சாற்றூரைச்‌ சார்ந்தவன்‌. இவனை ஆவூர்‌ மூலங்கிழார்‌ பாடியுள்ளார்‌.

குடியிருப்பிடம் “பூண்டி” எனப்படுகிறது. “சூழ்ந்து கொள்ளுதல்” என்னும் வினையடிப்படையில் இச்சொல் தோன்றியிருக்கிறது.[25] கி.பி. 9 ஆம் நூற்றாண்டில் “பூண்டி” என்ற வழக்கு இருந்திருப்பதை, “முடுகு நாறிய வடுகர் வாழ் முருகன் பூண்டி” என்னும் சுந்தரரின் பாடலடிகள் உணர்த்துகின்றன.[26] சிற்றூர்களைக் குறிப்பிடும் பல சொற்களில் பூண்டி என்பதுவும் ஒன்றெனச் சூடாமணி நிகண்டும் சேந்தன் திவாகரமும் குறிப்பிடுகின்றன. [27]
பொதுக்கூற்று வடிவமாக மட்டுமின்றித் தனி ஊர்ப்பெயராகவும் “பூண்டி” வழங்குகின்றது.

தேவாரத் திருத்தலங்கள்

சங்க கால ஊர்கள்

தம் தேவாரப் பாடல்களில், சம்பந்தர் பூழியூர் பற்றிச் சுட்டுகின்றார் (175-8). பிற எண்ணங்கள் தெளிவில்லை.

திருப்பூவணம் என்று மதுரை மாவட்டத்தில் காணப்படும் தேவார மூவராலும் போற்றப்படுகிறது. மாணிக்கவாசகரும் இதனை,
பூவண மதனிற் பொலிந்திருந்து அருளித்
தூவண மேனி காட்டிய தன்மையும் (கீர்த்தி – 50-51)
எனப் பாடுகின்றார். இதன் பெருமையை,
முறையார் முடிசேர் தென்னர் சேரர் சோழர் கடாம் வணங்கும்
திறையார் ஒளிசேர் செம்மை யோங்குத் தென்றிருப் பூவணமே – (64-1)
என்று சம்பந்தர் சுட்டுவது விளக்கவல்லது. மேலும் வைகைக் கரையில் அமைந்த இதன் நிலையையும்,
பாரார் வைகைப் புனல் வாய்ப்பரப்பி பன்மணி பொன் கொழித்துச்
சீரார் வாரி சேர நின்ற தென்றிருப் பூவணமே (64-3)
என்ற இவரது பாடல் சித்திரிக்கின்றது. பொழில் திகழும் பூவணம் என்று பாடுகின்றார் அப்பர் (232). சுந்தரர், சீரின் மிகப் பொலி யும் திருப்பூவணம் (11-10) எனக் கூறும் போது இவ்வூரின் சிறப்பும் தெரிகிறது. பூக்கள் வனம் பூவணமாயிருக்கலாம் என நினைக்கலாம். பழையூர், புதூர், கோட்டை, நெல்முடிக்கரை என்ற நான்கு பகுதிகளையுடையது பூவணம் புஷ்பவனகாசி. பிதுர் மோட்சபுரம், பாஸ்கரபுரம், இலட்சுமிபுரம், பிரமபுரம், இரசவாதபுரம் என்பன இதன் வேறு பெயர்கள்.

தேவாரத் திருத்தலங்கள்

பூவனூர் என்ற தலம் தஞ்சாவூர் மாவட்டத்தில் உள்ளது. பாமணி ஆற்றின் கரையில் உள்ள தலம் சுக முனிவர் மலர் வனம் வைத்து வழிபட்டு அருள் பெற்ற தலம். அப்பர், இங்குள்ள சிவனைப் போற்றும்போது.
மேவ நூல் விரி வெண்ணியின் தென்கரைப்
பூவனூர் புகுவார் வினைபோகுமே (179-4)
எனப்பாடுகின்றார். எனவே ஆற்றின் கரைத்தலம் இது என்பது தெளிவாகிறது. ஆற்றின் கரையில் உள்ள தலம் ஆகையால் செழிப்புடன் இருந்திருக்கும் என்பதில் ஐயமில்லை. மேற்கண்ட புராணக் கருத்தின்படி மலர் வனம் இருந்த நிலையை அறிகிறோம். எனவே மலர்வனம், பூவனம், பூவனஊர் பெயரால் வழங்கப்பட்டு வந்த ஊர் பின்னர் பூவனூர் என வழங்கத் தொடங்கியிருக்கலாம் என்று தோன்றுகிறது. இறைவனின் பெயர் புஷ்பவன நாதர் என்பதும் இக்கருத்துக்கு வழி வகுக்கிறது.

தேவாரத் திருத்தலங்கள்